കവിത | നീ വഴിയെ കൊഴിഞ്ഞു വീഴും

നീ വഴിയെ കൊഴിഞ്ഞു വീഴും 

{നൊബേൽ സമ്മാന ജേതാവും ലോകപ്രശസ്ത സാഹിത്യകാരനും ആയ പാബ്ലോ നെരൂദയുടെ  “യൂ സ്റ്റാർട്ട് ഡയിങ് സ്‌ലോലി” എന്ന കവിതയുടെ എന്റെ മലയാളം സാക്ഷാത്കാരം}

നീ വഴിയെ കൊഴിഞ്ഞു വീഴും;

മുന്നേറാത്ത നിൻ വഴിയോരങ്ങളിൽ 

വായനയകന്ന നിൻ അച്ചുപിഴകളിൽ 

കേഴ്‌വി കെട്ട നിൻ കടൽവഴികളിൽ 

ആത്മനിഷേധമാം നിൻ ഇടവഴികളിൽ 

നീ വഴിയെ കൊഴിഞ്ഞു വീഴും; 

ആത്മചൈതന്യത്തിൻ അന്തകനാവുകിൽ 

അന്യശരണായനത്തിൽ നിരോധവുമാവുകിൽ 

നീ വഴിയെ കൊഴിഞ്ഞു വീഴും; 

നിൻ പഴക്കത്തിൻ ഭൃത്യനായ് ഭവിച്ചീടിൽ 

നിൻ നടവഴികൾ എന്നുമൊന്നായിരിക്കിൽ 

നിൻ ചടങ്ങുകൾ അചഞ്ചലമാവുകിൽ 

നിൻ ധർമ്മങ്ങൾ വർണ്ണശബളമല്ലാതിരിയ്ക്കുകിൽ 

അഥവാ വാക്കുകൾ അജ്ഞാതർക്കപ്രാപ്യമാവുകിൽ 

നീ വഴിയെ കൊഴിഞ്ഞു വീഴും;

ഉദ്ദാമവൈഭവം ഭാവരാഗലയമയമായനിൻ 

അകക്കാമ്പിൻ മിടിപ്പേറ്റും ഉണർച്ചയാം സ്വഭാവങ്ങളി-

ലഭിനിവേശം സ്പർശവർജ്ജ്യമാവുകിൽ 

തരളദ്യുതിയണഞ്ഞീടും നിൻ നയനദ്വയതാരകങ്ങളിൽ 

നീ വഴിയെ കൊഴിഞ്ഞു വീഴും;

നിന്നയോഗ്യകർമ്മമോഹബന്ധനങ്ങൾ തുടരവേ

നിന്നസ്ഥിരതയ്ക്കുമേൽ സമരാഹ്വാനം മൂകമാകവേ 

സ്വധർമ്മപരിപാലനത്തിൻ സ്വപ്നസഞ്ചാരം നിലയ്ക്കവേ

സ്വജീവചക്രത്തിലെന്നെങ്കിലും സ്വച്ഛന്ദമായ് 

അനുശാസനത്തിൽനിന്നൊളിച്ചോടിയില്ലെങ്കിൽ  

നീ വഴിയെ കൊഴിഞ്ഞു വീഴും !

💙💙💙💙💙💙💙💙